Cociña de aproveitamento: di non ao desperdicio alimentario en Nadal

Este Nadal, queremos exporche un reto: dicir non ao desperdicio alimentario. Durante estas datas, son tantas as celebracións que non adoita faltar a planificación dos menús que se van a preparar para todas elas, pero non é tan frecuente contar cun plan B. E cal é ese plan B? Ter previstas tamén comidas para aproveitar as sobras destes días. Complicamos un pouco máis o desafío? Conseguir que sexan saudables 😉. Que che parece? Anímaste a dicir non ao desperdicio alimentario en Nadal? Aquí traemos algúns consellos e ideas para que a creatividade non sexa o límite! E non esquezas as palabras chave: cociña de aproveitamento.

Que é a cociña de aproveitamento?

A cociña de aproveitamento consiste en sacar o máximo partido aos alimentos da nosa despensa dunha maneira sostible. Trátase de evitar que produtos que poderían ter unha segunda vida acaben no cubo do lixo. O desperdicio alimentario é un problema que se agrava durante estas datas e é importante ser conscientes de que hai que mitigalo para fomentar o consumo responsable e a optimización dos recursos dos que dispoñemos. Por iso, hoxe propoñémosche reutilizar as sobras das comidas do Nadal para preparar novos pratos cos que sorprender entre festa e festa.

Iso si, é importante ter claro tamén que a cociña de aproveitamento non significa que non poidas utilizar algún ingrediente novo. Seguramente, será necesario para conseguir un prato equilibrado, saudable e que resulte novidoso aos comensais.

Consellos para aproveitar as sobras destes días

Para lograr pratos de aproveitamento tan saborosos como os orixinais, é importante coidar a maneira de gardar os restos de comida:

• Utiliza recipientes herméticos para gardar as sobras no frigorífico ou no conxelador e evitar a transferencia de sabores.
• Consume o antes posible aqueles alimentos que gardes no frigorífico.
• Ten en conta a receita de aproveitamento que pensaches á hora de gardar as sobras porque así podes facelo da forma na que vas utilizalo.
• Desgrasa os caldos antes de conxelar para evitar que o sabor poida verse afectado.

Receitas de aproveitamento para os menús destas datas

Vichyssoise

Coas verduras, o caldo e as patacas cocidas que che sobraran dalgunha das preparacións, podes cociñar unha vichyssoise (crema de allos porros) deliciosa.

Ingredientes:

• 2 allos porros
• 1 pataca cocida
• ½ cebola branca
• 400 ml de caldo de polo ou de verduras
• 10 ml de aceite de oliva virxe extra
• Sal

Preparación:

1. Pica a cebola e os allos porros para cocelos ou cociñalos ao vapor.
2. Unha vez listos, introdúceos nun vaso de batedora coa pataca cocida, as verduras que che sobraran, o caldo, o aceite e o sal para triturar.

Verte a mestura nunha pota e cociña dous minutos máis. Retifica o sal se é necesario e lista para servir!

Bacalhau à Brás

En moitos fogares galegos, é frecuente cear en Noiteboa bacallau con coliflor, así que tiramos dun dos pratos típicos de Portugal para propoñer unha receita completamente diferente na que poderás reutilizar o bacallau sobrante.

Ingredientes (para 4 persoas):

• 3 patacas
• 300 g bacallau desmigado
• 4 ovos
• Olivas negras
• 8 ceboliños
• Sal
• Perexil

Preparación:

1. Desmenuza o bacallau sobrante e reserva.
2. Pela as patacas e córtaas en palliñas finas. Déixaas en auga fría para que logo queden ben soltas e non se peguen unhas a outras. Antes de fritir, sécaas deixándoas sobre un pano de cociña.
3. Saltea, nunha tixola, a ceboliña cortada á xuliana fina. Cando estea blandiña, engade os anacos de bacallau.
4. Frite as patacas noutra tixola ata que estean douradas e crocantes. Escórreas sobre un papel absorbente antes de mesturalas co sofritido de cebola e bacallau.
5. Engade os ovos batidos, removendo con coidado ata que o ovo empece a callar. Apaga o lume para que quede ben zumarento.
6. Serve nunha fonte, espolvorea o perexil picado e decora cunhas olivas negras.

Carne con alcachofas e salsa de queixo

Podes preparar esta receita con calquera carne que sobrase das celebracións e suxerímosche as alcachofas como guarnición porque son grandes aliadas das dixestións.

Ingredientes:

• 300 g de carne
• 150g queixo semicurado
• 100 ml viño branco
• 100 ml auga
• 300 g alcachofas (poden ser en conserva)
• 1 tomate

Preparación:

1. Se é posible, corta a carne en medallones grosos e reserva.
2. Limpa ben as alcachofas, frega con limón e cóceas durante uns minutos ata que estean tenras. Despois escórreas e córtaas en cuartos
3. Prepara o tomate á prancha ou no forno cun pouco de aceite de sal.
4. Para facer a salsa de queixo, pon a auga e o viño branco nun cazo e leva a ebulición. Engade anacos de queixo e deixa que coza uns minutos. Despois tritura ata obter unha textura de salsa cremosa.
5. Quenta a carne nunha tixola e xa podes servir, cubrindo lixeiramente coa salsa de queixo e poñendo unha guarnición de tomate e alcachofas (fríteas un pouco para que queden ben crocantes antes de servir).

Xurdíronche ideas para aproveitar as sobras dos teus menús do Nadal? Cóntasnolas? Desexámosche un 2023 feliz, sostible e saudable!