Especial #GadisSalud: a nectarina

Xa levamos uns cuantos días de verán e seguro que coincidimos en que unha das mellores cousas que nos trae esta estación son as froitas de óso como os albaricoques, as ameixas, os paraguaios ou as nectarinas. Por iso, no noso especial #GadisSalud de hoxe, imos falar da froita coñecida como nectarina, aínda que recibe moitos outros nomes. É perfecta para un tentempié pola súa achega de auga e o seu baixo contido calórico, pero, ademais, pode conferir un toque sorprendente a algunha das túas receitas. É verdade que a nectarina xa leva unhas semanas na sección de froitas e verduras do teu Supermercado Gadis, pero adiantámosche que agora chega o mellor! Porque, aínda que a súa recolección empeza a finais de maio, é en xullo cando alcanza o seu punto de maduración óptima. Queres saber máis? Segue lendo!

Que é a nectarina?

Tal vez te estás a preguntar que é exactamente unha nectarina. Por dentro parécese a un pexego, pero fáltalle ese tacto “aterciopelado” no exterior. O seu sabor tamén é diferente e podería lembrar ao da ameixa. É entón unha mestura entre ambos? Pois non. Está descartado que se trate dun híbrido. En realidade, a nectarina, chamada así polo seu sabor doce que lembra ao néctar, é, en termos estritos, unha variedade de pexego. Como o les, sería “a irmá calva” 😉. Esta variedade xorde de forma espontánea e crece no mesmo melocotonero. De feito, xeneticamente ocorre algo curioso, xa que dunha semente de pexego poden saír árbores de nectarina e viceversa. En España, é coñecida por distintos nomes dependendo da rexión: pelón, pavía, briñón, berisco, nectarina, rato…

Orixinaria de China, Irán e Afganistán, foron os romanos quenes a trouxeron a Occidente. Ten unha cor vermella intensa e a súa carne pode ser branca ou amarela, adherida ao óso ou solta. É unha froita zumarenta, pero con certa tersura. Do mesmo xeito que o pexego, o seu sabor é doce cun punto acedo. Na actualidade, os cultivos máis extensos de nectarina atópanse en Asia, Estados Unidos e a conca mediterránea, sendo España o maior produtor da Unión Europea. O noso país produce anualmente ao redor de 500.000 toneladas de nectarinas (datos de 2020), dos que exporta unha gran parte. As comunidades autónomas con maior superficie de froitas de óso son Aragón e Cataluña.

Os beneficios da nectarina

Ademais de ser unha froita refrescante e deliciosa, a súa achega nutricional é alta polo seu contido en vitaminas C, B6, B3, B2 e B1, así como en minerais (fósforo, potasio, magnesio, sodio, ferro, selenio, iodo e zinc). O seu consumo habitual pode reportar moitos beneficios:

O seu alto contido en fibra mellora a saúde intestinal e axuda a combater problemas como o estreñimento.
Axuda a dixerir as graxas e mellora as dixestións.
Ao ser rica en potasio, axuda a previr enfermidades cardiovasculares.
A súa achega de carotenos contribúe a protexer a vista, a pel, as uñas e o cabelo.
A vitamina C, o selenio, os carotenos e o zinc actúan como antioxidantes e frean o envellecemento.
O magnesio axuda a equilibrar o sistema nervioso central e a manter o sistema muscular.
Axuda a controlar a hipertensión grazas ao seu contido en sodio e en potasio.
O seu contido en vitamina C mellora a absorción de ferro e axuda a combater a anemia.

Como elixir e conservar as nectarinas

Aquí deixámosche uns consellos para escoller e conservar as nectarinas a próxima vez que vaias ao teu supermercado Gadis:

Non te deixes enganar pola súa cor á hora de escoller que nectarinas están máis maduras. Non sempre as de cor máis avermellada son as máis doces. Como podes saber cal levar? Achega a peza ao nariz e se desprende un olorciño doce, esa é!
Para conservalas, recomendámosche que as gardes na neveira. Se as deixas fóra, acelerarase a súa deshidratación e a súa textura farase máis fariñosa. Mesmo con refrixeración, non adoitan aguantar máis de 4-5 días, así que teno en conta á hora de calcular a cantidade que vas comprar.
Se compraches de máis, non te preocupes! Hai unhas cantas receitas para as que canto máis maduras estean, mellor: marmeladas, confeituras, xeados… Tamén podes facer conservas.

Cociña con nectarinas

O uso culinario das nectarinas é similar ao das ameixas. O máis habitual é utilizalas para tartas, marmeladas, confeituras, conservas en almíbar… Con todo, unha forma deliciosa e sorprendente de incluilas nos teus menús é á grella porque acádase unha suave caramelización dos azúcares e resultan perfectas como acompañamento. Hoxe propoñemos unha receita refrescante e saudable, ideal para esta época do ano.

Receta de xeado sen azúcar de nectarina

Ingredientes:

10 nectarinas maduras
2 iogures naturais
2 cucharadas de mel ou outro edulcorante natural (opcional)

Preparación:

Pela as nectarinas, córtaas en anacos e gardalos nunha bolsa de conxelación ben pechada.
Enche unha bandexa para facer cubiños de xeo con porcións de iogur.
Mete a froita e as bandexas de iogur no conxelador durante polo menos un día.
Ao cabo dun día, xa podes comezar a preparación. Na batidora ou licuadora, incorpora a froita e o iogur ata que estean ben mesturados. Se queres conseguir un resultado máis doce, é o momento de engadirlle o mel ou outro edulcorante como dátiles, por exemplo.
Cando todo estea picado e unificado, vérteo nun bol e introdúceo no conxelador como mínimo media hora.
Para servilo, podes engadir froitos secos picados para achegar un toque crocante ou trozos de froita fresca.

Gústanche as nectarinas? Vaste animar a probalas á grella?

Volver ao blog