Especial #GadisSalud: as cenorias

Hoxe no noso especial #GadisSalud falamos de cenorias. Si!, sabemos que, a primeira vista, quizá non che pareza a verdura máis interesante. Está aí todo o ano, achegando un toque ás ensaladas e ás potaxes, pero pouco máis; nunca como protagonista! Con todo, o certo é que é un alimento con infinidade de beneficios para a saúde e hoxe imos facer que che pareza un pouquiño máis atractiva. Comezamos?😉

Onde se cultiva e cando é o momento óptimo para consumir cenoria?

Aínda que orixinariamente procede do oeste de Asia, a cenoria é unha hortaliza de consumo habitual en todo o mundo. De acordo coa FAO, os tres maiores produtores de cenoria son China, Estados Unidos e Rusia. En España, segundo os últimos datos do Ministerio de Agricultura, a produción rolda as 400.000 toneladas e está especialmente concentrada en Andalucía e Castela e León.
Ao tratarse dunha hortaliza tan estendida, podes atopala na sección de froitas e verduras do teu supermercado Gadis todo o ano. Con todo, a mellor época para consumir cenorias é durante a segunda metade da primavera (maio-xuño), porque é cando son máis tenras e doces. No inverno, son máis grosas e están máis ricas se as cocemos un pouco.
Estamos no momento óptimo para o seu consumo. Seguro, ao ler o artigo, xa che entraron ganas de saír a comprar cenorias, pero, coa suba de temperaturas, talvez te esteas preguntando como podes conservalas para que duren máis tempo frescas. Aquí deixámoste algúns consellos:

• Se as mercas con follas, é mellor que llas quites para que non acumulen humidade.
• Non convén lavalas ata o momento de consumo.
• Non as gardes preto de patacas ou mazás porque o gas etileno que producen fará que se estraguen antes.
• Na neveira poden durar ata un par de semanas, pero outra opción de conservación é conxelalas. Iso si, nada de metelas directamente ao conxelador! Primeiro hai que escaldalas con auga fervendo e sal.

Os beneficios das cenorias

A pesar de que a fama da cenoria adoita deberse ás propiedades bronceadoras do betacaroteno, en realidade, son outros os beneficios máis importantes deste composto. Seguro que algunha vez escoitaches que a cenoria é boa para a vista, case como unha crenza popular ou un consello de avoas, e é certo! Débese ao seu contido en betacaroteno. A capacidade antioxidante deste composto fomenta a produción de vitamina A e axuda a protexer a retina. Por iso, a cenoria contribúe a previr a dexeneración macular e as cataratas, entre outras afeccións.
Pero non só a vista benefíciase da introdución de cenorias na túa dieta, tamén a pel. De novo é a función antioxidante dos betacarotenos a que acelera o proceso de curación dunha ferida. Tamén axuda a atrasar o envellecemento porque combate os radicais libres (que se dedican a deteriorar as células). Estes beneficios nótanse tamén no pelo e nas uñas, que estarán máis fortalecidas.
Pero non só os betacarotenos achegan beneficios. Hai máis compoñentes das cenorias que fomentan as súas propiedades!:

• O seu alto contido en auga convérteas nunha achega de fibra beneficiosa para a saúde do sistema dixestivo.
• A súa composición rica en sales minerais como o potasio, o cloro e o sodio axuda a calmar a acidez.
• E, para quen padece problema de estrinximento, viralles ben comelas crúas porque non se ve alterado por ningún proceso de cociñado. Con todo, se se ten diarrea, a cenoria cocida axuda a paliala polos seus compoñentes adstrinxentes. Xa ves, é un 2×1!

Non penses que para obter todos estes beneficios das cenorias vas ter que fartarte. Comer unha ao día achégate o 89% da cantidade diaria necesaria de vitamina A no caso de que sexas un home adulto e un 112%, se es muller.
Só mencionamos algúns dos seus beneficios, pero hai moitos máis: axuda a diminuír o colesterol, a mitigar os efectos da acne e os eccemas (cando se consome en zume), favorece a lactación e pode axudar a previr determinados tipos de cancro como o de vexiga e de larinxe. É unha hortaliza do máis completa!

Receita de tortitas de brócoli e cenoria

Ingredientes:

• 125 g de brócoli
• 125 g de cenorias
• 2 ovos
• 30 g de queixo relado
• Aceite de oliva (unha cullerada)
• Perexil
• Sal
• Pementa

Preparación:

1. Pela e rela as cenorias. Lava o brócoli e divídeo en acios. Ferve ambos os produtos durante aproximadamente 5 minutos, ata que empecen a estar tenros.
2. Retira a pota do lume e corta o brócoli en anacos máis pequenos. Colócao nunha ensaladeira xunto coa cenoria. Engade o perexil picado e mestura todo.
3. Noutro bol, bate os ovos e engade o queixo relado, o sal e a pementa. Remove ben e incorpora esta mestura ao recipiente onde estaban as cenorias e o brócoli.
4. Nunha tixola, engade unha cullerada de aceite de oliva e incorpora a mestura en pequenos montóns. Dálles volta e volta ata que teñan forma de tortita e estean douradas por fóra. Mentres, pre-quenta o forno e cobre unha bandexa con papel vexetal.
5. Con moito coidado, pasa as tortitas da tixola á bandexa. Enforna ata que se douren durante aproximadamente 15 minutos e listo!. Unhas tortitas saudables e moi saborosas, perfectas para usar de guarnición ou como cea lixeira.

As cenorias forman parte do teu fondo de despensa? Tes algunha receita estrela? Estamos a desexar que nola contes.