Receitas do prato ALIMENTES con produtos de verán

Acabamos de inaugurar o verán e que mellor maneira de comezalo que buscando a maneira de sacarlle todo o proveito posible á túa despensa estival?! Durante as próximas semanas, seguramente modificarás as túas rutinas e, cando iso sucede, custa un pouco máis manter unha alimentación saudable, verdade? Ademais, é unha época na que hai que planificar mellor a compra porque as temperaturas tamén afectan á conservación dos alimentos. Por iso, propoñémosche que botes man do prato ALIMENTES: o menú saudable, a guía visual que che axudará a deseñar menús equilibrados con produtos de verán. Nos nosos supermercados Gadis atoparás unha gran variedade de produtos frescos no punto óptimo para o seu consumo e aquí deixámosche algunhas ideas para que deseñes pratos saudables con todo o que che brinda esta estación. Anímaste a organizar os menús estivais coas nosas suxerencias? Segue a ler!

Produtos de verán

Xa perdemos a conta das veces que repetimos o noso mantra para un consumo sostible e responsable: produtos de proximidade e de tempada. Consumir froita e verdura cando está en tempada non só é beneficioso para o medio ambiente, tamén ten vantaxes para a túa economía e para a túa saúde. Pero, sobre todo, é a forma de gozar do seu mellor sabor e textura. Ademais, o verán é a estación que maior variedade e sabor ofrece!

Este é un bo momento para comprar froitas e verduras que axudan a manter unha boa hidratación. É a época do melón, a sandía, o aguacate, as froitas de óso como o pexego, o albaricoque, a ameixa ou a nectarina, a cereixa, a frambuesa, o figo e o mango. Tamén é ideal para consumir cabaciña, cebola, xudía verde, nabo, cogombro, pemento, ravo, remolacha, tomate e cenoria, por exemplo. A carne e o peixe tamén teñen tempada e adoita estar marcada, entre outros factores, polos ciclos de reprodución ou as vedas de caza.

É unha estación ideal para consumir peixes azuis, como a sardiña coa que inauguramos o estío saltando as cacharelas. Tamén o atún, o bonito, a cabala e o xurelo. En canto ao peixe branco, estamos en tempada de San Martiño, castañeta vermella, ollomol, escarapote e pescada. Tampouco te podes esquecer da gamba e a lura, que poden protagonizar pratos deliciosos. No que respecta á carne, hai menos, pero, durante estes meses, pódese consumir carne de caza como paspallás, rula ou coello, por exemplo.

Receitas do prato ALIMENTES con produtos de verán

Este é o menú que preparamos, tendo en conta as proporcións do prato ALIMENTES (½ prato de vexetais e froitas, ¼ prato de proteínas saudables e ¼ prato de grans integrais).

1. Crema fría de cenoria

Ingredientes:

• 1 cebola
• 1 dente de allo
• 1 kg cenorias
• 1 l caldo de verduras
• Loureiro
• 1 culleradiña cúrcuma moída
• 1 culleradiña tomiño seco
• ½ limón (zume)
• 1 culleradiña perexil
• Aceite de oliva virxe extra
• Pementa negra moída
• Sal

Preparación:

• Pica a cebola e o dente de allo.
• Lava e parte as cenorias.
• Pon dous ou tres culleradas de aceite de oliva nunha pota e pocha a cebola co dente de allo. Engade as cenorias e remove ben.
• Incorpora o loureiro, a cúrcuma, o tomiño, o zume de limón, pementa negra e un pouco de sal. Cobre co caldo de verduras. Cando chegue a ebulición, deixa cocer a lume lento ata que a cenoria estea moi branda.
• Retira do lume e deixa temperar antes de triturar todo. Podes engadir máis caldo en función da consistencia desexada. Salpimenta ao gusto.
• Arrefría a crema no frigorífico e espolvorea o perexil á hora de servir. Podes engadir tamén queixo fresco, crème fraîche ou iogur.

2. Taboulé de cogombro e aguacate

Ingredientes:

• 150 g cuscús
• 150 ml zume de pomelo
• 1 cogombro
• 1 aguacate maduro
• Brotes para ensalada
• 1 pemento verde pequeno (tipo Padrón)
• 1 guindilla fresca vermella
• 45 ml vinagre de viño branco
• Aceite de oliva virxe extra
• Sal

Preparación:

• Mestura o zume de pomelo coa mesma cantidade de auga quente. Pon o cuscús nun bol e verte o zume sobre el. Cobre e deixa hidratar durante uns dez minutos.
• Retira as sementes ao pemento e á guindilla. Parte e ponos nun vaso de batedora. Engade o vinagre e tres culleradas de auga, e tritura. Engade catro culleradas de aceite e un pouco de sal e mestura ben.
• Pela e curta en dados o cogombro e o aguacate.
• Remove o cuscús cun garfo e pono nunha fonte.
• Mestura o cuscús co cogombro, o aguacate e os brotes de ensalada. Rega co vinagre e repárteo ben. Deixa arrefriar no frigorífico ata o momento de servir.

3. Milhojas de mango e frambuesas

Ingredientes:

• 1 mango
• 1 terrina de frambuesas (poden ser conxeladas)
• Lemon curd (ao gusto)
• Follas de menta fresca

Preparación:

• Podes preparar o lemon curd ou mercalo.
• Pela e abre un mango para cortar dúas rebanadas finas, das que sacarás rectángulos.
• Para cada milhojas, corta 3 frambuesas en rodaxas e colocáas sobre unha lámina de mango. Engade unha cullerada de lemon curd sobre as frambuesas e cobre con outra lámina de mango.
• Podes decorar cunha liña de frambuesas e menta fresca.

Que che parece este menú estival? Vas probalo este verán?